Скарынаўскі Цэнтр - асветніцкая дзейнасць

Каранацыя Міндоўга на караля і ўтварэнне новай дзяржавы на тэрыторыі Беларусі

У 2003 годзе Нацыянальны навукова-асветніцкі цэнтр імя Ф.Скарыны ўдзельнічаў у мерапрыемствах, якія ладзіў Нацыянальны арганізацыйны камітэт па 750-годдзю каранацыі Міндоўга як караля Беларуска-Літоўскай дзяржавы. У Цэнтры 27 чэрвеня 2003 г. адбылося паседжанне круглага стала “Каранацыя Міндоўга на караля і ўтварэнне новай дзяржавы на тэрыторыі Беларусі”, у якім удзельнічалі навукоўцы і грамадскасць Беларусі. Паседжанне вёў старшыня Нацыянальнага арганізацыйнага камітэта і вядучы навуковы супрацоўнік Цэнтра прафесар Анатоль Пятровіч Грыцкевіч, які і адкрыў паседжанне.
Акрамя таго, у межах святкавання гэтай найважнейшай падзеі ў стварэнні новай дзяржавы на тэрыторыі Беларусі былі праведзеныя наступныя мерапрыемствы:
5 ліпеня 2003 г. у Менскім Палацы мастава была адкрыта Нацыянальная выстава “Каранацыя Міндоўга”. У гэты ж дзень у Доме літаратара адбылося Паседжанне грамадскасці і ўрачысты канцэрт, прысвечаны гэтай гістарычнай падзеі.
6 ліпеня ў Наваградскім фарным касцёле адбылася ўрачыстая імша ў гонар каранацыі Міндоўга, а 9 ліпеня ў Нацыянальным навукова-асветніцкім цэнтры імя Ф.Скарыны адбылося адкрыццё дзіцячай мастацкай выставы “Кароль Міндоўг”.
На сайце даецца тэкст выступу прафесара А.П.Грыцкевіча на круглым стале 27 чэрвеня г.г.

Анатоль Грыцкевіч - Каранацыя Міндоўга як дзяржаўны акт

Беларуская шляхта і яе роля ў гісторыі і культуры Беларусі

27 траўня 2003 г. у Нацыянальным навукова-асветным цэнтры імя Ф.Скарыны адбылася публічная лекцыя на тэму “Беларуская шляхта і яе роля ў гісторыі і культуры Беларусі”. Лекцыя выклікала вялікую цікавасць грамадскасці і разам з адказамі на пытанні працягвалася дзве гадзіны. Лекцыю чытаў доктар гістарычных навук, прафесар Анатоль Пятровіч Грыцкевіч, які ў Цэнтры імя Францішка Скарыны працягвае свае даследаванні па гісторыі беларускай шляхты. Асноўныя палажэнні лекцыі былі паўтораныя па 1-й праграме Беларускага радыё 27 ліпеня 2003 г. На сайце даецца скарочаны пераказ лекцыі прафесара А.П.Грыцкевіча.

Анатоль Грыцкевіч - "Беларуская шляхта"

Кіркевіч Уладзімір Міхайлавіч нарадзіўся ў1938 годзе ў Сярэдняй Азіі. Сваю нацыянальную прыналежнасць вызначае як беларускую. Дзяцінства прайшло ў Пінску Брэсцкай вобл. Яшчэ ў юнацтве любоў да жывапісу і сакрэты складанай тэхнікі работы акварэллю яму перадаў яго першы настаўнік — мастак-акварэліст Яўген Пулхаў. Уладзімір Кіркевіч вучыўся ў Пінскім гідрамеліярацыйным тэхнікуме (1952–1956), Кіеўскім гідрамеліярацыйным інстытуце (1956–1961). Атрымаўшы спецыяльнасць інжынера-гідратэхніка, у 1961 г. пераехаў ў Крым, на будаўніцтва Паўночна-Крымскага канала, дзе працаваў на працягу дваццаці гадоў. З 1969 г. жыве ў Феадосіі. У 1992 г. завочна закончыў факультэт жывапісу і графікі Універсітэта мастацтваў у Маскве. Шмат падарожнічаў па свеце, бываў у Беларусі, Прыбалтыцы, Расіі. Але больш за ўсё яго вабяць пейзажы Паўднёва-Усходняга Крыма — Феадосія, Кактэбель, Судак, Стары Крым, Карадаг і ўлюбёнай Беларусі— Пінск, Полацк, Тураў, Нясвіж, Мінск, Магілёў, Гродна, Брэст, Віцебск і інш. З 1991 г. У. Кіркевіч цалкам прысвяціў сябе творчасці. Працуе ў тэхніцы камернай акварэлі, у рэалістычнай манеры пісьма, уласцівай традыцыям старых майстроў. Любімыя жанры — пейзаж і нацюрморт. Яму ўдаецца перадаць самыя тонкія адценні стану прыроды. Наш суайчыннік удзельнічаў у больш чым у 100 выстаўках. Самыя ганаровыя для яго адбыліся падчас святкавання 150-годдзя з дня нараджэння Ільі Рэпіна (Чугуеў,  жнівень 1994 г.), падчас правядзення V Міжнароднага фестывалю мастацтваў ”Славянскі базар” (Віцебск, ліпень 1996 г.), у верасні 1997 г. у Пінску у гонар 900 годдзя горада; у кастрычніку 1997 г. у Кіеве.  Карціны У. Кіркевіча знаходзяцца ў шматлікіх музеях, прыватных калекцыях Украіны і за мяжой.Уладзімір Міхайлавіч ахвотна перадае свой вопыт моладзі. З 1992 г. мастак вядзе мастацкі гурток «Акварэль». Увесь вольны час прысвячае жывапісу: піша эцюды з натуры, наведвае выстаўкі і музеі, вывучае кнігі па мастацтву, прымае актыўны ўдзел у навуковых канферэнцыях.Неаднаразова наведваў Цэнтр імя Ф. Скарыны ў Мінску і падараваў свае мастацкія творы. Мастак актыўна ўдзельнічае ў культурным жыцці беларускай дыяспары на Украіне.
На сайце падаецца каталог акварэляў выставы "Беларусь" Уладзіміра Кіркевіча.